LEGAZPI CITY – Piglinaw kan Legazpi City Engineering Office na wara sindang naresibing report manungod sa mga tinampong kaipuhan nin rehabilitation.
Kasunod ini kan mga agrangay kan mga residente kan Purok 4, Barangay Gogon, Legazpi City huli sa lubak-lubak na tinampo sa saindang lugar na nakaka apektar na sa bulos kan trapiko.
Segun ki Legazpi City Engineering Office Assistant City Engineer Noel Encinares sa intrevista kan Bombo Radyo Legazpi na kun may pondo na an Legazpi City Government, tulos sindang magibo nin program of work para sa rehabilitation kan tinampo.
Pwede na ninda magibo sa laog nin sarong semana an program of work nganing ma-isumite na asin ma-alokaran na nin pondo an mga rehabilitasyon kan mga Barangay road.
Nagkapira man sa saindang pigtututukan na mga barangay sa Legazpi iyo an Brgy. San Fransisco asin Cagbacong na parehong nasa kabuludang parte kan ciudad.
Suhestyon ni Encinares na mas magayon kun napaabot tulos sainda an mga agarangay mapadapit sa mga siring kaining bagay nganing magibuhan ninda tulos nin magkakanigong papeles asin maisumite na sa Office of the Mayor para sa pondo na gagamiton.
Pagdoon kaini na dae na pag-agihon sa social media an mga problema kan saindang barangay nin huli ta bako gabos na opisyal ninda an naggagamit nin mga cellphone.
