LEGAZPI CITY-Piglalaoman kan sarong abogado na makulong an mga politikong imbuelto sa pagkakaigwa nin iregularidad sa mga flood control projects.
Segun kay Political Analyst Atty. Michael Henry Yusingco, sa intrevista kan Bombo Radyo Legazpi, na dapat makasuhan an mga darakulang pangaran bako sana an suboot mga “small fry” sa gobierno.
Dagdag pa kan abogado na huli sa law making ini, dapat asahan an pagkakaigwa nin legal reforms na dapat isagibo enot na sa mga budget process kung sain nagkaigwa nin mga anomalya.
Dugang pa niya na kaipuhan man an mga reporma sa implementasyon kan proyekto, kung sain igwang mga natapos na proyekto sa papel sana alagad pagabot sa mismong proyekto an dai pa ini nagibo.
Afuera digdi, kaipuhan man suboot an reporma dapit sa project implementation kung sain pwedisir italaga an monitoring asin evaluation ngani masierto na an mga proyekto an naipapatugdok nin tama.
Sinabi man ni Yusingco na piglalaom niya sa iba pang komite na magkaigwa nin mga ligal na reporma ngani masolusyunan an problema orog na supisyente na an ley siring kan graft asin corruption na dapat magtugon digdi.
Dapat man suboot na maipaluwas kan senado an pagbreakdown sa sistema, proseso, asin maaraman kung sain nagkaigwa nin graft asin corruption.
Katakod kaini, responsibilidad man suboot kan Ombudsman na magsangat nin kaso asin dapat dai sinda matakot na hampangon an mga dynastic politician asin matatapos sana an imbestigasyon kun igwang makukulong.
