LEGAZPI CITY- Dae pa man nagpupundo an mga naoobserbarang aktibidad sa bulkang Mayon sa mga nakalihis na oras.
Nag-abot sa 69 an magkakasunod na lava fountaining episodes sa bulkan na nairehistro kan seismic monitoring network kan Philippine Institute of Volcanology and Seismology (PHIVOLCS) na puon sa tolong minuto hasta sa labi sa tolong oras an pinakahaloy.
Katakod kaini, tinawang-duon kan PHIVOLCS na dae pa pwedesir na ibaba an nakabanderang Alert Level 4 sa bulkang Mayon urog na nagpapadagos pa man an pagbulos kan lava siring man an halangkaw na gas output na nag-aabot sa labi sa 2000 tonelada sa laog sana nin sarong aldaw.
Mientras tanto, dae man pighahale kan ahensya an posibilidad na magpapadagos sana an pagbulos kan lava hasta sa magbaba an aktibidad o pwedesir man na mag-abot sa mas makusog na pagputok en kaso na mabarahan an pasingawan kan gas.
Hinale man ni Albay Public Safety and Emergency Management Office (APSEMO) chief Dr. Cedric Daep an pagkahandal kan publiko sa nag-aalburotong bulkang Mayon kun saen sinabi na distansya sa bulkan an nagsisirbeng asegurasyon kan mga tawo asin bako an mga nahihiling sa tuktok kaini.
