LEGAZPI CITY — Padagos an pangapudan kan local government unit kan Daraga sa mga residente kan Barangay Miisi, Salvacion, Matnog asin Bañadero na dae na magdunong asin kusa nang magpasiring sa mga evacuation center.
Ini makalihis an magkakasunod na pag-buga nin abo kan Bulkang Mayon na rason ngani mag-abot na sa 8km extended danger zone an pinaebakwar kan mga otoridad.
Segun ki MDRRMO officer Alex Comia, inobliga na suboot na mag-ebakwar an gabos na mga residente sa nasabing mga barangay para naman sa seguridad kan mga ini.
Nasambitan na nag-abot na hasta sa Old Miisi an daloy kan lava kun sain maging an mga itinanom na kahoy nin mahogany an inabot naman.
Sa presente, naglobo pa sa 2, 053 pamilya o kabilugang 8,196 indibidwal an inebakwar hale sa banwaan kan Daraga.
Dugang pa ni Comia na pinaghahandaan naman kaini an worst case scenario kun enkasong abuton naman nin ashfall an Malabog evacuation center, mapipiritan sindang iebakwar an mga evacuees.
Mientras tanto, sienerto man kan opisyal na itatao ninda an gabos na pangangaipuhan kan mga apektadong residente.
Sa ibong na lado, dakula man an pasasalamat ni Comia sa lokal na gobierno kan Sorsogon na padagos suboot na nagpapadara nin tabang sa mga apektadong residente.
