LEGAZPI CITY – Nakapagrehistro nin landslide sa parte kan Maharlika road sa Barangay Malabog, Daraga, Albay.
Segun ki Daraga MDRRMO Head Alex Comia sa intrevista kan Bombo Radyo Legazpi, posibleng naglumoy an daga sa nasabing parte kan lugar huli sa pirmihan na pag-uran.
Tulos man na nagresponde an mga otoridad sa lugar asin ipinagpasalamat na warang nairido sa insidente.
Nagsagibo tulos nin clearing operation an Department of Public Works and Highways Second District Engineering Office sa porsyon kan tinampo kun sain nagkaigwa nin pagrasahay nin daga.
Plano kan opisina na magbugtak nin early warning sign ngani na maaraman kan publiko na saro ng landslide prone area an nasabing lugar.
Sinabi ni Comia, ini an enot na bes na nagkaigwa nin lanslide sa nasabing parte kan lugar asin piglalaoman na posibleng masundan pa kun magdagos-dagos an pag-uran.
Inabisuhan man an mga motorista na magdoble-ingat lalo na ngonyan na mahalnas an mga tinampo.
