LEGAZPI CITY – Padagos na pig-aaram ngunyan kan mga kapulisan an pagkakabisto kan sarong lalaki na nadiskubreng wara ng buhay sa Purok 1, Brgy. Salvacion, Bacon District, syudad kan Sorsogon.
An biktima an pinagkakarkulong nasa pagultangan kan edad na 20 hasta 30-anyos asin nasa poco mas o menos 5’3” an langkaw na nakasulot nin striped na itom asin puting bado asin puting jacket asin itom na shorts.
Enot kaini, sarong Barangay Health Worker na nabistong si Gina Briones an nagpaabot kan impormasyon sa mga kapulisan sa Sorsogon City Police dapit sa nadiskubreng bangkay.
Nadiskubre sa pangenot na imbestigasyon na igwang pitong tama nin bala nin badil an biktima sa manlaen laen na parte kan hawak kaini na posibleng rason kan saiyang pagkagadan.
Nagtutubod man an mga residentes sa lugar na posibleng itinapok sana an biktima sa saindang barangay huli ta wara man sindang nadangog na putok nin badil.
Narekober sa pinangyarihan kan insidente an limang fired cartridge cases kan dae pa maaraman na kalibre nin badil.
Makalihis ini, tulos man na ipigsairarom sa otopsiya an hawak kan nasambitan na biktima.
