LEGAZPI CITY- Gadan an sarong lalaki makalihis na pagsasaksakon kan saiya mismong pamangkin mantang nasa inoman sa Barangay San Ramon, Daraga Albay.
Binisto an biktima na si Reymark Sevilla 27 anyos na residente kan nasabing lugar.
Susog sa impormasyon na naguno kan Bombo Radyo Legazpi, nagkakainoman sana suboot an magkakaparientes sa saindang residencia kan magkainitan an kambal kan biktima na si Raymond Sevilla asin an pamangkin kaini na si Jericho Sevilla.
Nagkasimbagan suboot an duwa huli sa kabuyongan, kung kaya nag-awat na an biktima hasta sa mag-uli an suspek na pamangkin.
Alagad pagbalik kan suspek, may dara na ining kutsilyo asin sinaksak sa likod an biktima na tulos na nagadan.
Sa ngunyan, pinaghahanap na kan mga otoridad an suspek na marikas na nagdulag paparayo sa lugar makalihis na isagibo an krimen.
