LEGAZPI CITY-Sarong Nepali mountain guide an nakaligtas makalihis na ma-stranded sa Mount Everest sa laog nin haros anom na aldaw na warang oxygen, pagkakan, asin istaran.
Binisto ini na si Dawa Sherpa, na pigtubudang gadan na, makalihis na dai ma-contact mantang pababa sa Mount Everest.
Alagad makalihis an anom na aldaw, nakua siyang buhay kan sarong cleanup team mantang siya luway-luway na nagbaba pasiring sa Everest Base Camp.
Tulos siyang dinara sa helicopter pasiring sa sarong ospital sa Kathmandu, kun siya binulong huli sa dehydration, frostbite, asin pagkabari nin mga tulang.
Sinabi kan lalaki na nawaran siya nin oxygen mantang yaon sa itaas kan bulod, na nagin rason kan saiyang pagka-stranded.
Ipinahayag man niya na wara siyang pagkakan sa enot na duwang aldaw, alagad nagin salbado siya sa paagi kan pag-upak nin yelo ngani sana makainom nin tubig.
Nakakua man siya nin tsokolate sa saiyang bulsa, na nakatabang sa saiya na maghaloy pa nin pirang aldaw sa itaas kan Mount Everest.
Nagpapasalamat man an mountain guide na nagkaigwa nin na nagin dahilan kan pagkawara kan crevasse asin pagkapano kan yelo na nagtao saiya nin tsansa na makaluwas.
Naggamit man siya nin lubid ngani makababa sa ibong kan peligro nin mga avalanche.
Basado sa mga report, lima katawo an nagadan sa climbing season sa Everest, kun sain sa kabilogan, labi sa 300 katawo na an nagadan poon pa kan taong 1920s.
