LEGAZPI CITY—Takdag sa kamot kan mga otoridad an pigkonsiderar na 45-anyos na lalaki na pigkonsiderar na High Value Individual sa ginibong pagpapaotob nin search warrant kan mga otoridad sa banwaan kan Irosin, Sorsogon.
Kinundusir an operasyon kan Special Operations Unit 5 kan Philippine National Police Drug Enforcement Group, asin Irosin Municipal Police Station, basado sa Search Warrant na inisyu kan Regional Trial Court Branch 55, Irosin, Sorsogon kan Agosto 17, 2026.
Nakumpiskar sa suspek an pirang pakete nin pigtutubudang shabu na may gabat na 58 gramos, asin may Standard Drug Price na P394,400.
Afuera digdi, nakumpsikar man an sarong caliber .45 na badil, sarong magazine, pitong pidaso nin live ammunition, sarong sadit na papel na pigtutubudang ginamit bilang lalagyan kan droga, sarong glass tooter, asin tulong assorted lighters.
Isusumiter an mga nakumpiskar na drug evidence sa Sorsogon Provincial Forensic Unit para sa laboratory examination, mantang an nakumpiskang badil an isasairarom sa verification asin ballistic examination.
Basado sa ginibong verification sa Investigation Solutions (IS) Platform, nagluwas na igwa nang naenot na kaso an suspek na may kinaaraman sa pagbalgar sa Republic Act No. 9165 o Comprehensive Dangerous Drugs Act of 2002, na kalaunan an na-dismiss kan korte.
Sa presente nasa kustodiya ini kan Irosin MPS para sa magkakanigong disposisyon asin pagsunad nin nararapat na kaso.
