LEGAZPI CITY — Pig-aaram pa kan mga otoridad an pagkakabisto kan lalaking nadukayang gadan sa hampang kan sarong waiting shed sa banwaan kan Pilar, Sorsogon.
Enot kaini, sarong concerned citizen an nagpaabot kan impormasyon sa mga kapulisan katakod kan nasambitan na bangkay sa Brgy. Putiao kaya tulos na nagpadara nin tauhan an hepe ngani na iberipikar an impormasyon.
Segun ki Pol. C/Insp. Ruel Pedro, hepe kan Pilar Municipal Police Station, pigkakarkulong nasa 20 hasta 25-anyos an biktima na nakasulot nin berdeng T-shirt, asul na kalo asin itom asin violet na jacket.
Nakagakod an kamot asin bitis kan lalaki gamit an sarong wire mantang nadiskubre man na dakol ining tama nin bala sa payo asin iba pang parte kan lawas na rason kan kagadanan kaini.
Segun pa sa opisyal na nakarekober sa lugar kun sain ini nadukayan, duwang fired cartridges kan kalibre 45 na badil an dinara sa Regional Crime Laboratory Office 5 ngani na isairarom sa ballistic examination.
