LEGAZPI CITY— Nauli sa madugong pangyayari an maogma kutang pagselebrar nin kapistahan sa Barangay Quezon, Bulan, probinsya kan Sorsogon.
Sinaksak kaya sa dae pa maaraman na rason an biktimang si Edison Mantes, 35-anyos kan saiyang sadiring amigo na si Wilfred Loregas.
Sa imbestigasyon kan Bulan Municipal Police, nagbabayli an duwa sa basketball court katakod kan nasambitan na okasyon kan bigla na sanang bungagon ni Loregas si Mantes.
Susunudan pa kuta kan suspek an pag-atake alagad napugulan ini kan saindang iba pang kaibanan na amigo.
Nag-uli suboot si Loregas alagad armado na nin kutsilyo kan magbalik sa nasambitan na pabayli.
Dae na nakadulag an biktima sa pananaksak kan suspek kun sain sya tinamaan sa manlaen-laen na parte kan saiyang hawak.
Dinara sa ospital an biktima mantang dae pa mahanap kan mga otoridad an nagdulag na si Loregas.
Sa ngunyan, inihahanda na an kasong isasangat kontra sa suspetsado.
