Arestado an sarong lalaki makalihis na saksakon an saiyang dating partner asin presenteng partner kaini sa laog kan sarong harong sa sarong subdivision sa Brgy. Cabuco, Trece Martires City, Cavite.
Nagluluwas sa inisyal na imbestigasyon kan Trece Martires City Police Station na alas 2:45 nin hapon, naglaog an suspek na si alyas ‘Ardin’ sa harong kan dating live-in partner kaini na si Mary Grace Tanzo mantang nagkakakan ini kaiba si Richard Capucanan, 39 anyos.
Nagluluwas na nakainom an suspechado kan mangyari an insidente asin armado nin duwang kutsilyo.
Tulos kaining sinaksak an mga biktima, na nagin rason nganing magkaigwa nin lugad sa liog si Capucanan, mantang si Tanzo tinamaan sa abaga asin muro.
Marikas na idinalagan an duwa sa General Emilio Aguinaldo Memorial Hospital para sa tulos na pagbulong.
Tulos man na nagresponde an mga pulis asin nadakop an suspetsado pirang minutos makalihis an insidente.
Segun sa mga awtoridad, selos an posibleng motibo kan insidente.
Yaon ngonian sa kustodiya kan Trece Martires City Police Station an suspek asin mahampang sa 2 counts nin frustrated homicide.
