LEGAZPI CITY—Nailigtas kan mga kapwa parasisira an sarong lalaki makalihis na mahulog ini sa piglulundang bangka sa banwaan kan Baras, provincia kan Catanduanes.
Segun ki MDRRMO Baras Head Engr. Khalil Tapia, sa intrevista kan Bombo Radyo Legazpi, na nakaresibi nin report an Municipal Disaster Risk Reduction and Management Office Baras mapadapit sa nahiling na bangka sa parte kan Brgy. Guinsaanan “Binurong Point” kan nasambitang banwaan na padagos soboot na nag-aandar alagad wara man nin nakalunad na persona.
Tulos man na inaram kan saindang opisina an posibleng insidente asin kinumpirmar na an sarong 51-anyos na lalaki na residente kan Barangay Putsan kan nasambitang banwaan an nawawarang parasisira sa naunambitang bangka.
Sinabi kaini na sagkod sa ngonian dae pa ninda aram kun pano nahulog an lalaki sa saiyang piglulunadang bangka.
Kan mailigtas na ini tulos man na tinawan nin pangenot na pagbolong asin dinara sa ospital para sa kadugangang asistensyang medikal.
Sa presente nakauli na an biktima asin nasa maray nang kamugtakan.
Mientrastanto, nagpagiromdom man si Engr. Tapia sa mga parasisira na pirme dapat sindang may kairiba urog na kun mapasiring sa laot asin magsulog nin mga bado na madali nahihiling nganing madali man sinda mahiling sa mga siring na sitwasyon.
Pig-engganyar man kaini an namamanwaan na en kaso may mai-report na mga siring na inisidente tulos man na makipagkoordinar sa saindang opisina asin sa Philippine Coast Guard ngani maparikas an saindang pagreresponde.
