LEGAZPI CITY – Nagpaparahay na sa ngonyan sa ospital an sarong lalaki makalihis na magsapar nin mga lugad makalihis kan pagtitigbason kan mag-ama na suspek sa Zone 2, Barangay 37-Bitano, Legazpi City.
Binisto an biktima na si Resty Bañez, 28-anyos na residente kan nasabing lugar.
Segun ki Lt/Col. Dennis Balla, hepe kan Legazpi PNP sa intrevista kan Bombo Radyo Legazpi, base sa testimonya kan nakahiling sa insidente, nag-abot na sana sa lugar an mga suspek na sinda Arnaldo Tripulca Jr., 24-anyos asin saiyang ama na si Armando Tripulca, 56-anyos na armado nin tabak asin matatagas na bagay.
Nagkaigwa pa nin argumento an mga suspek asin an biktima hasta sa pagtitigbason na ninda Arnaldo asin Armando si Resty na nagsapar nin lugad sa saiyang payo.
Tulos man na dinara sa Bicol Regional Training and Teaching Hospital (BRTTH) an biktima kan mga nakahiling sa insidente mantang marikas man na nagdulag paparayo an mga suspek.
Tulos man na naarestar kan mga nagrespondeng pulis si Arnaldo alagad nakadulag asin pinaghahanap pa an ama kaini.
Napag-araman na haloy ng dae pagkakasinabutan an pinagpunan kan iwal kan mga suspek asin biktima na nauli sa paninigbas.
Nagpapadagos pa man sa ngunyan an hot pursuit operation kan mga otoridad ngani na maarestar an nakadulag na suspek.
