LEGAZPI CITY—Gadan an sarong 53-anyos na lalaki makalihis na ma-hit and run ini sa Barangay Buang, Tabaco City, Albay.
Segun ki Brgy. Buang Kagawad Mariette Nuarin, sa intrevista kan Bombo Radyo Legazpi, na susog sa mga nakahiling kan insidente, na nag-overtake an sarong puting van sa sarong kolor pula na truck.
Alagad, nasagi kan puting van an biktima na sarong motorista kun saen pigbabaybay kaini an linya pasiring sa Barangay Matagbac kan nasambitang ciudad.
Dugang kan opisyal na gikan soboot an biktima sa Barangay Amtic, Ligao City, Albay.
Huli sa pagkakasagi kan puting van sa motorsiklo, natumba soboot an biktimang drayber kaini asin nakabalyo an saiyang kabangang parte kan lawas sa linyang pasiring sa ciudad kan Ligao.
Alagad dae man tulos nakapreno an kolor pula na truck na iyong pig-overtake kan puting van resulta kun nata naligis kaini an payo kan biktimang motorista.
Basado man sa CCTV footage sa lugar, nagin marikas soboot an pagpapadalagan kan puting van.
Mientrastanto, nangapudan man ini sa mga drayber kan duwang behikulo na magsurender na sinda sa kapulisan.
Nagpagiromdom man an opisyal sa mga mabiyahe urog na ngonian na Semana Santa na hilingon asin reparuhon muna an saindang mga behikulo bago magbiyahe siring man an magpangadyi.
