LEGAZPI CITY—Gadan an sarong lalaking driver makalihis an nangyaring salpukan kan saiyang pigmamanehong top-down tricycle asin sarong pampasadang bus sa Sitio Caladgao, Barangay Buraburan, Juban, Sorsogon.
Segun ki Municipal Disaster Risk Reduction and Management Office Juban Head Arvee Lodronio, basado sa saindang impormasyon pwedesir na head-on collision an nangyari sa nasambitang mga behikulo.
Tulos man na dinara an biktima sa ospital alagad idineklarar ining dead on arrival.
Dugang ni Lodronia, wara man na nairido na mga pasahero kan pampasadang bus.
Sa presente, nasa kustodiya na kan Juban Municipal Police Station an drayber kan bus para sa imbestigasyon.
Mientrastanto, pagiromdom man kan opisyal sa mga drayber na magin maingat asin siertohon na nasa maray na kamugtakan an saindang behikulo magin an pag-check kan saindang mga sadiri bago magbiyahe.
