LEGAZPI CITY – Labi an pagmundo kan pamilya kan sarong lalaki sa Purok-1 Barangay Palanog, Camalig, Albay makalihis na bawian nin buhay kan pagbabadilon kan duwang dae pa nabibistong mga suspek.
Nabisto an biktima na si Jayson Navera, 32-anyos asin residente kan nasambitan na lugar.
Segun ki Police Chief Inspector Darwin Asejo, chief of police kan Camalig Municipal Police, nasa luwas kan saiyang harong an biktima kan biglang magrani saiya an mga suspek asin pinaputukan ini nin badil.
Naidalagan pa man sa ospital si Navera alagad idineklarar na dead on arrival huli sa sinapar na tama nin bala.
Dugang pa kan opisyal na pinag-adalan na man nindaa an mga CCTV na harani sa pinangyarihan kan krimen alagad dae nahagip kaini an motorsiklo na pinaglulunadan kan mga suspek.
Sa presente nagpapadagos pa an ipigkokundusir na hot pursuit operation kan mga kapulisan asin hinali na man sa anggulo na saindang pighihiling an pagkakaimbwelto sa iligal na droga huli ta wara man suboot ini sa listahan kan mga drug surrenderees.
Sa nguyan padagos an mahigot na pagbabantay kan mga otoridad sa trapiko ngani na mabantayan an mga motorista urog na an mga nagagamit nin motorsiklo na komon na pigagamit sa mga krimen.