LEGAZPI CITY — Pinaglalamayan na nunyan an sarong lalaki makalihis na bawian nin buhay katakod kan aksidenteng pagkakahulog sa puon nin niyog.
Nabisto an biktima na si Rogelio Dichoso Jr, 34-anyos asin Residente kan San Juan, Roro, syudad kan Sorsogon.
Segun sa impormasyon na ipinaabot kan Sorsogon City Police Station, sarong Rolando Divina an nagpasiring sa saindang hepatura ngani na ipaabot an dapit sa pagkagadan kan nasambitan na persona.
Nagluluwas sa inisyal na imbestigasyon kan mga kapulisan na, nagpasiring an biktima sa Sitio Madan-an, Barangay Bibincahan, sa nasambitan na syudad kaibanan an sarong Juan Maneses ngani na magsakat asin magkua nin niyog alagad aksidente suboot ining nahulog.
Huli sa insidente, tulos na binawian nin buhay an nasambitan na biktima.
Sa presete nagpapadagos pa an ipigkokundusir na imbestigasyon kan mga kapulisan dapit sa nasambitan na insidente.
