LEGAZPI CITY—Arestado an sarong lalaki sa kinundusir na gun buy-bust operation kan mga otoridad sa banwaan kan Pilar sa provincia kan Sorsogon.
Segun ki Pilar MPS Acting COP PCPT Brian Bea, sa intrevista kan Bombo Radyo Legazpi, binisto an suspetsado na sarong 28-anyos asin residente kan Barangay Dapdap kan nasambitang banwaan.
Naarestar ini sa pinagsarong operatiba kan Provincial Special Police Force Unit, Regional Intelligence Unit 5, Provincial Mobile Force Company, asin Pilar Municipal Police Station.
An suspetsado nagbalo na magpabakal nin badil sa saindang personahes alagad durante kan pakikipagtransaksyon sa kwarta, tulos man ining inarestar kan mga saindang mga operatiba.
Nakumpiskar digdi an sarong 9mm pistol na igwang magasin asin may apat na bala.
Afuera digdi nakumpiskar man an gun buy-bust money na ginamit na may kantidad na P15,000—kun saen saro digdi an genuine bill o tunay na kwarta mantang 14 man an pekeng P1,000 bills.
Sa presente, an suspetsado nasa kustodiya na kan Pilar MPS asin mahahampang sa kasong pagbalgar sa Acta Republika 10591 o an Comprehensive Firearms and Ammunition Regulation Act.
Mientrastanto, nagpatanid man ini sa publiko na ibitaran an pagkakaimbuelto sa ano man an ilegal na aktibidades huli ta an kapulisan dae mapundo sagkod na dae napupuho an mga ini.
