LEGAZPI CITY—Nakapagrehistro nin lahar flow gikan sa Bulkang Mayon sa Barangay Salvacion, Daraga makalihis an mga naeksperyensyahang pag-uuran kan mga nakalihis na aldaw.
Segun ki Kapitan Justo Lumaban kan nasabing barangay sa intrevista kan Bombo Radyo Legazpi, na medyo mahewas an inagihan kan nasabing lahar flow alagad marikas man ining natapos.
Wara man na naapektaran na mga residentes durante kan pagdaloy kaini.
Dugang kan opisyal na dati na man ining pig-agihan kan lahar o floodway lugar gikan sa salog kan Barangay Anoling, Camalig.
Saro man sa pigkahaditan kan saindang barangay an mga makukusog na pag-uran huli sa pwedesir na maanod an nakatambak na materyales sa Mi-isi gully pasiring sa ibang direksyon na dae makokontrol kan saindang floodway.
Huli kaini pighahagad ninda sa gobierno na ma-desilt na an nasabing area nganing anuman na oras na magkusog an bulos kan lahar an maduro-diretso an direksyon kaini paibaba.
Segun ki Lumaban na preparado an saindang barangay para sa posibleng pagpaebakwar sa mga residentes en kaso na maglala pa an sitwasyon.
Abiso kaini sa mga konstituwentes na kun magkusog an mga pag-uuran an pigbabawal na magpasiring sa parte kan Mi-isi-Binaan channel nganing malikayan an biglaang bugso nin lahar.
Sakop kan 8-kilometer permanent danger zone an naunambitang barangay.
