LEGAZPI CITY- Diit na revision na sana suboot an isasagibo sa krinear na Lahar Risk Map sa bulkang Mayon tangarig na ma-assess an huma na dara kan mga natipon na volcanic materials katakod kan makapirang beses na pagputok kaini.
Ipinagsugo ni Presidential Adviser on Political Affairs asin Mayon Eruption crisis manager Secretary Francis Tolentino sa mga concerned agencies an paghabol sa nagkapira pang pagbabago sa detalye antes an cabinet meeting sa Abril 4 kun saen ipipresentar suboot kaini an contingency plan.
Kaibanan sa mga pigtatawanan nin atensyon an mapping kan volume kan deposits sa kada river system na pwedeng ibaba sa peryodo kan makusog na tag-uran.
Mientras tanto, klinaripikar man kan Philippine Institute of Volcanology and Seismology (PHIVOLCS) an total ejecta kan bulkan kun saen hale sa enot na na-compute na 92 million cubic metres, nagbaba na ini sa 64.8 million cubic metres.
Segun ki resident volcanologist Ed Laguerta, nagkaigwa suboot nin recomputation sa ejecta huli ta drone na an gamit na pasukol ngonian sa kada channel hale sa dating aerial survey na igwang mas halawig na sakop.
