LEGAZPI CITY- Kinontra ni Albay 1st District Representative Edcel Lagman an mga nagsasabing mamantenir ni Minority Leader Danilo Suarez an posisyon sa Kamara sa ibong kan pagbotong pabor sa speakership post ni House Speaker Gloria Macapagal Arroyo.
Sa intrevista kan Bombo Radyo Legazpi ki Lagman, ipigduon kaining otomatikong mai-aapply sa sitwasyon an House rules na magigin miembro na kan mayorya an mga nag-uyon sa leadership change pasiring ki Arroyo, kaibanan na si Suarez.
Wara na man suboot ining direchos na magclaim pa sa posisyon huli ta an 12 Liberal Party members na piniling mag-abstain sa botohan an solamenteng maapod na lehitimong miembro kan minorya.
Dugang pa ni Lagman na posibleng nalinagwan sana kan mga kaibanang lehislador an repercussion kan pagbabago kan liderato sa Kamara sa nagbibilog sa mayorya asin minorya.
Mientras tanto, napag-araman na nagkaigwa na man nin consensus an grupo kun saen napili si resigned-House Deputy Speaker Miro Quimbo tangarig na magtindog na minority leader mantang nagsurat naman ki House Speaker Gloria Macapagal Arroyo sa komposisyon kan minorya sa Kamara.
Klinaripikar man ni Lagman na wara pang nareresibeng surat an minorya sa pigsasabing pagsurog ni dating House speaker Pantaleon Alvarez sa grupo asin sinabing pag-iisipan an magigin desisyon kun en kaso.
