LEGAZPI CITY – Nagtao nin friendly advice si Albay 1st district Rep. Edcel Lagman ki President Rodrigo Duterte na dae makasierto na dae ini makukua kan International Criminal Court (ICC).
Segun ki Lagman, dae dapat ipasipara kan administrasyong Duterte an posibilidad na makua kan International Criminal Court (ICC) an hurisdiksyon katakod kan mga kaso kontra ki Pres. Duterte para sa pagkakaimbwelto, pag-akit o condonation kan extrajudicial killings na katakod kan madugong kampanya kontra sa iligal na droga na pwedesir ikonsiderar bilang krimen kontra sa sangkatauhan.
Ipigdugang pa kan konresista na pwedesir mag-take over an ICC sa imbestigasyon kan extrajudicial killings kun dae man mapagkakatiwalaan an mga state agencies na magibo nin honestong imbestigasyon.
Dapat suboot na warang pigkikilingan, honesto asin magayong buot na pag-iimbestigar, pag-uusig o prosecution asin trial an gigibuhong imbestigasyon kan estado asin bako pang-front sana.
Ipigduon pa kan Albayanong pulitiko na pigratipikahan kan Pilipinas an Rome Statute kan ICC kan Agosto 30, 2011 kun saen naging ika-117 state party an nasyun sa nasabing kasunduan o pangaduwang ASEAN country.
