Nagtutubod si Senator Panfilo “Ping” Lacson na dae magpapadara si Ombudsman Jesus Crispin “Boying” Remulla sa pressure na dara kan ipigkondusir na rally kan Iglesia Ni Cristo (INC) sa EDSA People Power Monument sa Quezon City.
Sa sarong post sa X (daing twitter), sinabi ni Lacson na kumpiyansa siyang magtetenir na pusog si Remulla sa pag-otob sa saiyang mandato, sa ibong kan pagkontra kan INC sa nakatalaan na pagsusunad nin kasong plunder kontra ki senator Rodante Marcoleta.
Enot kaini, nagpahayag nin pagkontra an INC sa planong pagsusunad nin kasong plunder kontra ki Marcoleta.
Sa binasang pahayag ni INC spokesperson Edwil Zabala, kinuwestiyon kan grupo kun nata kakasuhan an senador maski pa ini an nagbuyagyag kan suboot anomalya sa mga flood control projects.
Segun ki Zabala, dae pig-uuyunan an reklamong may koneksyon sa suboot P75 million campaign donation na tinanggap ni Marcoleta kan 2025 elections.
