LEGAZPI CITY- Pigpapa sierto kan sarong labor group sa Department of Labor and Employment (DOLE) na ma-monitor an mga employers asin mga negosyante na nagpapaotob na kan wage order no. 28 sa National Capital Region.
Ini an dugang na P60 sa aldawan na sahod kan mga obrero sa nasabing rehiyon.
Segun ki Partido Manggagawa Deputy Secretary General Wilson Fortaleza sa intrevista kan Bombo Radyo Legazpi na kinakaipuhan na nareresibe na kan mga obrero an dagdag na sahod asin siertuhon na dae naaabuso kan mga negosyante.
Sa ibong kaini, sinabi kan grupo na dae man liwat dapat paglingawan an napasipara na wage order 27 o an P85 na dagdag sahod na dae na-implementar sa ngunyan.
Marurumduman na nagpaluwas nin kasuguan an korte na suspinderon an wage order 27 asin kalaunan an nagpaluwas nin bagong wage order no. 28.
Segun ki Fortaleza na nagtetenir na nakabinbin an enot na dagdag sahod kaya dae ini dapat malingawan kan mga obrero.
