LEGAZPI CITY- Liwat na tinawan duon kan sarong labor group na panahon na ngani na tutukan kan administrasyon an pangangaipo kan mga obrero sa nacion.
Segun ki Partido Manggagawa Deputy Secretary General Wilson Fortaleza sa intrevista kan Bombo Radyo Legazpi, dae marhay natukar ni Presidente Ferdinand Marcos Jr. an mga programa para sa mga obrero.
Katakod kaini, sinabi kan opisyal na mas pighahalat kan mga obrero iyo an nakabinbin sa kongreso na legislated wage hike na P200.
Idugang pa digdi an pag-abolish kan presenteng provincial rate.
Segun ki Fortaleza na kinakaipuhan sana na mag-establishar nin national wage law ngani na magin pantay-pantay an sweldo kan gabos na mga manggagawa sa bilog na nacion.
Tinawan duon kaini na kun dae mahiro an paglangkaw kan sweldo, dae man makakasabay an mga namamanwaan sa paglangkaw kan mga barakalon.
