LEGAZPI CITY- Dawa pa sinabat nin hiro-protesta, mantenidong matoninong an naging pagselebrar kan Labor Day o Aldaw nin mga Obrero sa provincia kan Albay.
Segun ki PC/Insp. Arthur Gomez, tagapagtaram kan Albay Police Provincial Office, piglaoman na ninda an mga siring na aktibidad kun kaya nagkaigwa na nin preparasyon sa lado kan kapulisan antes pa man na magpuon an rally sa ganap na alas-ocho nin aga.
Apwera sa mga ipig-deploy na pulis para sa paz y orden, nagdesignar man nin mga personahes an ahensya sa mga dae piglalaomang insidente.
Base sa report kan Albay PNP, buminadol sa poco mas o menos 500 na perssona an nagtiripon-tipon sa hampang kan Camp General Simeon Ola sa ciudad kan Legazpi asin nagmartsa pasiring sa freedom park kun saen ikinurahaw an mga kahagadan sa gobyerno siring man sa mga maysadiri nin negosyo dapit sa lado kan empleyo asin iba pang katakod na isyu.
Mientras tanto, dakula an kaugmahan kan Police Regional Office 5 huli ta warang nakulugan o anuman na dae pinaglaoman na insidente durante kan paglunsar nin hiro-protesta sa mga lugar kan Naga, probinsya kan Albay, Sorsogon, Camarines Norte asin Catanduanes.
Siring man, nagpasalamat man an mga opisyal sa ginibong pagbabantay asin pagmonitor kan kapulisan sa nasambitan na aktibidad.
