LEGAZPI CITY — Ipigpapa-evaluate ngunyan kan ACTS OFW Partylist sa Department of Foreign Affairs (DFA) asin mga embahada kan Pilipinas an mga ipigdesignar na labor attaches kung naga-otob an mga ini sa saindang trabaho.
Tahasang pighayag ni ACTS OFW Partylist Rep. Aniceto ‘John’ Bertiz sa intrevista kan Bombo Radyo Legazpi na warang proper monitoring sa dakol na overseas Filipino workers (OFWs) an gobyerno kun nabiktima ini kan ‘Palit-Employer scheme’.
Ipighalimbawa ni Cong. Bertiz an sinapar kan Pinay na si Joanna Demafelis na nadukayan sa laog kan freezer sa Kuwait kun sain napag-araman na bako original sponsor o employer kaini an mag-agom na Lebanese asin Syrian national na suboot nasa likod kan pagadan sa OFW.
Pagbuyagyag pa kan kongresista na talamak an sistema sa Kuwait na direktang pagbalgar sa employment contract kun warang pagtugot kan embahada.
Kinondenar man kaini an nagkapirang agency na imbes tabangan makauli an mga OFWs na magdulag sa employer, pigkokumbinse pang magtenir asin hanapan nin bagong employer na rason ngani magin undocumented an mga ini.
Mientras tanto, pigpapasalamat man kan nasambitan na kongresista an pagpapaotob kan total deployment ban sa Kuwait urog pang napagparaman na enot na man ining nagsangat nin resolusyon kan 2016 para sa moratorium sa deployment huli sa halangkaw na numero kan mga naaabusong obrerong Pinoy.
