LEGAZPI CITY—Ipigdoon kan Philippine Egg Board Association na dakula an epekto kan summer season asin kan El Niño phenomenon sa pag-ataman nin mga livestock na hayop sa nacion.
Segun ki Philippine Egg Board Association President Francis Uyehara, sa intrevista kan Bombo Radyo Legazpi, an epekto kan labing init sa mga atamang manok iyo an pagluya kan saindang pagkakan na nagrereuslta man sa pagbaba kan productivity asin efiiciency kan saindang performance.
Afuera digdi an direktong epekto kaini iyo an nagsasadit an nakukuang sizes kan mga bunay na nagreresulta sa imbalance na distribusyon kan mga sizes kaya nagkakaigwa man nin oversupply sa mga sadit na bunay.
Dugang ni Uyehara na sa ngunyan na namamatean na an pag-uuran an diit-diit naman na nag-improve an nakukua nindang egg sizes huli man kan teknolohiya asin farm management.
Alagad sa ibong kaini pigproblema man ninda an humidity o napaghalong init asin lipot huli sa ‘very inviting’ ini sa bacteria asin viruses sa mga atamang manok.
Segun pa saiya na hasta sa presente lugi man liwat an presyuhan kan bunay huli sa cost of produce dara kan nagpapadagos na krisis sa Middle East.
Sinabi man ni Uyehara na may bukas man sindang komunikasyon sa Department of Agriculture para mga programa, asistensya sa ibang aspeto kan saindang sektor, mantang wara pa man sindang natatanggap na specific assistance na may kinaaraman sa weather condition sa pag-ataman nin mga manok
