LEGAZPI CITY—Pigkarkulong maabot sa 20 mga ayam asin ikos an pigtutubudang hinudong sa Barangay San Roque, Legazpi City, Albay.
Segun ki Albay Animal Welfare Coalition President Atty. Roger Abitria, sa intrevista kan Bombo Radyo Legazpi, na kan naresibi sinda nin report dapit sa insidente, sainda ining ipigkoordinar sa mga opisyales kan barangay alagad dae ninda masyadong nagustuhan an simbag kan mga ini.
Nagngangalas man sinda kun nata hanggang sa ngunyan warang aksyon an barangay mapadapit sa insidente, huli ta nangyari na man ini kan nakaaging taon asin kan nakaaging bulan.
Alagad sa saiyang pakikipag-olay liwat sa kapitan kan barangay, sinabi kaini na iimbestigaran soboot an insidente.
Dugang kan opisyal na posibleng rason kan soboot na nanghudong sa mga hayop iyo an pamomroblema sa overpopulation asin may mentalidad an personang nanghudong na peste an mga ini.
Mientrastanto, nangangapudan man si Atty. Abitria sa kun sisay man an aram sa may kagibo sa panghuhudong, na ipagtaong aram ini sa saindang opisina ngani na magkaigwa nin hustisya an mga nahudong na mga hayop magin an mga may kagsadiri kaini.
