LEGAZPI CITY- Labing panghihinayang an namamatean ngonian kan sarong negosyante makalihis na malalay an mga makantidad na pagsadiring gamit sa pigrerentahan na apartment sa Brgy. 42, Rawis, Legazpi City.
Hudyan na kan maaraman kan biktimang si Noel Sunga, 55-anyos na kagsadiri kan sarong construction supply na nakabase sa Daet, Camarines Norte na nawawara na palan an mga importanteng gamit kaini.
Nagluluwas sa imbestigasyon na sarong dae pa nabibistong lalaki na nakasulot nin puting T-shirt, short pants asin bull cap an naglaog sa apartment kan biktima.
Napag-araman na naghale sa lugar an pamilya tangarig na magduman sa Albay district kun saen nawalat an sarong empleyado sa construction supply alagad nagluwas man tangarig na magkaon nin pangudtuhan.
Sa pagbalik kaini, nadiskubre kan nasabing empleyado na bukas na an main door kan construction supply magin an main door kan harong kan pamilya asin nawawara na an nagkapirang gamit. Ipighayag man kan saro sa mga aki kan maysadiri kan apartment an pagkahiling sa sarong lalaki na pigpensar na empleyado sana sa construction supply.
Kaibanan sa mga nalalay an duwang mamahalon na relo, manlaen-laen na klase kan bulawan na alahas siring kan hikaw, singsing asin kulintas, tolong yunit kan mamahalon na laptop asin sarong netbook na pigkakarkulong igwang kabilugan na kantidad na P3, 555, 000.
Sa presente, nagkokondusir naman nin follow up investigation an mga otoridad para sa posibleng pagkakaarestar kan suspek.
