LEGAZPI CITY-Uminabot na sa 80,000 indibidwal o katumbas nin labi sa 23,000 pamilya an apektado kan pinagsarong epekto kan bagyong Maymay, hanging habagat asin nakalihis na bagyong Luis, susog sa Office of the Civil Defense (OCD).
Nairehistro an mga apektadong pamilya sa Ilocos Region, Cagayan Valley, Central Luzon, Zamboanga Peninsula, Bangsamoro Autonomous Region in Muslim Mindanao (BARMM) asin Cordillera Administrative Region.
Sa mga apektadong pamilya, naebakwar pasiring sa mga evacuation center an labi sa 2,000.
Basado sa pinakahuring datos kan ahensiya, warang nairehistrong casualty, nairido, o nawawara na may koneksyon sa raot nin panahon.
Mientras tanto, nakapagrehistro man an ahensya nin 12 kaharonan na napinsala.
Nakapagrehistro man nin pagbaha sa 83 lugar sa Ilocos Region, Cagayan Valley, Zamboanga Peninsula asin BARMM.
Katakod kaini, sinierto kan Department of Social Welfare and Development (DSWD) an tabang sa mga apektadong pamilya sa tahaw kan mga kalamidad, kun sain igwa nang naka-preposition na family food packs asin igwang standby funds enkaso kaipuhanon.
