LEGAZPI CITY – Dakula an pasasalamat kan 742 TESDA scholars sa Masbate makalihis na makaresibe nin libreng tool kits makalihis na makumpleto an assessment asin certification tests kan Technical Education and Skills Development (TESDA).
Segun ki Mildred Marcaida, TESDA provincial director, an ika-tulong distrito kan nasambitan na probinsya an igwang pinakadakulang pondo sa scholarship kumparar sa ibang distrito na nagin posible suboot huli katabangan ni Masbate Representative Scott Davies Seachon Lanete.
An pondo suboot sa ibang distrito sa probinsya an uminabot sana sa P1.5 million na kayang magtao nin asistensya sa 100 na scholars alagad an ika-tulong distrito an uminabot sa P10million kada taon an pondo na kayang magtao nin asistensya sa 1,000 scholars.
Mientrastanto, pighayag ni Marcaida na bako madali an paghahanap nin pondo para sa pagpoprodusir kan gabos na kits kaya dakula an saiyang pasasalamat ki Lanete sa pagtatao nin tiwala sa TESDA.
