LEGAZPI CITY-Naglobo an danyos na winalat ni Super Typhoon Uwan sa sektor kan mga agrikultura basado sa inisyal na pagbusisi kan Department of Agriculture (DA).
Uminabot na sa P188.27 million an kantidad kan danyos mantang nasa 6,580 na mga paraooma an natukoy na apektado.
Nagwalat man nin 10,839 na pagkawara sa produksyon asin nakaapektar ini sa haros 3,900 na ektarya kan mga sakahan.
Laoman man na mahalangkaw pa an kantidad kan danyos mantang nagpapadagos pa an assessment asin validation sa kadakol na mga lugar na nalubog sa tubig-baha hasta sa ngonian.
Nagpapadagos man an ebalwasayon na pigsasagibo kan Philippine Crop Insurance Corporation (PCIC) sa mga sakahang aapektado.
Sa presente, nakapaghatod na man an ahensya nin inisyal na tabang sa nagkapirang mga paraooma sa Northern Luzon siring kan distribusyon kan hybrid seeds ngani makapagtanom tulos enkaso magin maayos na an kondisyon kan panahon.
