LEGAZPI CITY- Idi-deploy na an dugang na Special Action Force (SAF) troopers sa Bicol an pulisya katakod kan Memorandum Order 32 na nagsusugong mapuho an kadahasan asin huma kan terorismo sa rehiyon asin sa mga lugar kan Samar, Negros Oriental asin Negros Occidental.
Sa pahayag ni Police Regional Office 5 (PRO5) Director PC/Supt. Arnel Escobal sa paghahapot kan Bombo Radyo Legazpi, prayoridad kan nasa 68 SAF troopers na maipadara sa lugar na madedeterminaran sa field na igwang presensya kan mga local communist terrorist asin kriminalidad.
Mayor na konsentrasyon man sa ngonian segun ki Escobal an Camarines Sur urog na duman nairehistro an mga recent ambush sa mga miembro kan kapulisan alagad nakatalaan man na ibalyo sa ibang area an tropa, depende sa pagdevelop kan sitwasyon.
Pighihiling kaya na makakatabang man ini sa Masbate bilang preparasyon sa pirilian sa taong 2019.
Inasegurar man kan opisyal na mahiro sana an SAF asin idedesignar sa arin man na lugar susog sa intelligence operations mantang padagos man giraray an pag-assess sa sitwasyon.
Kumpiyansa man an opisyal na warang mababalgar na direchos humanos mantang nasa mission an nasabing tropa.
