Uminabot na sa labi sa 5,300 katawo kaibanan an mga Pilipino, an nagtetenir na nakakulong sa mga online scam centers harani sa border kan Myanmar asin Thailand sa ibong kan mahewasan na kampanyakontra sa human trafficking asin online fraud sa rehiyon.
Sa surat na ipinadara sa kapulisan kan Thailand, sinabi kan Civil Society Network for Human Trafficking Victim Assistance (CSNHTV) na dakol sa mga biktima an mga dayuhan na nagtetenir na nakakulong sa nagkapirang pasilidad sa laog kan mga lugar na kontrolado kan sarong armadong grupo sa Myanmar.
Kaibanan suboot sa mga nakakulong an hali sa China, Thailand, Malaysia, Brazil, Russia, Kenya, asin Pilipinas.
Segun sa United Nations, an mga scam center sa nagkapirang parte kan Southeast Asia, kaibanan an Myanmar asin Cambodia, an imbwelto sa mahewasan na online fraud na may ganansya na bilyun-bilyong dolyar kada taon.
Dakol sa mga nagtatrabaho an biktima nin human trafficking.
Pinangakuan an mga ini nin magayon na trabaho alagad kalaunan an napiritan na gumibo nin online scams sa irarom kan mahigot asin mapang-abusong kondisyon.
Kan nakalihis na taon, pinangenotan kan Thailand an mahewasan na operasyon kontra sa mga scam hub sa border kaini, kun sain nasa 5,000 katawo an naisalbar hali sa mga pasilidad sa Myawaddy, Myanmar.
Siring man, segun sa CSNHTV na dakol man liwat na mga compound an nagtetenir na bukas asin dae pa naaabot kan rescue operations.
Huli digdi, padagos suboot na nakakapaglansar nin online fraud asin human trafficking an mga sindikato, na nakaka apektar sa mga biktima sa manlain lain na parte kan kinaban, kaibanan an Estados Unidos asin Europa.
