LEGAZPI CITY — Naisumite na ki Presidential Adviser on Political Affairs asin Mayon eruption crisis manager Secretary Francis Tolentino an master plan para sa ikinahahandal na pagkakaigwa nin lahar flow huli sa pagbaba kan mga natipon na volcanic materials en kaso magkaigwa nin makugog na pag-uran.
Ini huli ta nakatalaang ipresentar kan opisyal an nasambitan na plano sa isasagibong cabinet meeting sa aga, Abril 4.
Sa ibong kaini, segun ki CDRRMO head Engr. Miladee Azur, padagos man giraray an saindang pagpaplano katabang an mga concerned agencies huli ta dakol an posibleng maapektaran kaini.
Pigkakarkulo kaya na maabot sa labi sa 15,000 pamilya o labi sa 20,000 na indibidwal an maapektaran enkaso magkaigwa nin lahar flow.
Mientras tanto, pigpapakarahay na man ngunyan an mga dokumento na kinakaipuhan sa pagpatitulo kan daga na pagtitindugan kan permanent evacuation center sa syudad ngani na dae na suboot madifisilan an mga residente kun igwang nag-aaging kalamidad.
Dugang pa kaini na dapat na halion sa saindang mga residentsya an mga residentes na maaapektaran kan lahar flow urog pang dakulang peligro kun maapaw an Yawa river.
