LEGAZPI CITY-Haros umabot na sa 2,025 katawo an excess deaths sa France huli sa naeksperyensyahang heatwave sa Europa poon kan huring semana kan Hunyo, susog sa public health officials sa lugar.
Napag-araman na ini an 30 porsyento na paglangkaw kumpara kan nakaaging semana.
Segun kay French Health Minister Stéphanie Rist, kapansin-pansin an paglangkaw kan numero kan mga nagadan, sa edad 45 pataas.
Napag-araman na kan Hunyo 24, nairehistro kan France an pinakamainit na aldaw sa historya kan nacion kun sain an temperatura uminabot sa haros 41 degrees Celsius sa Paris mantang an kabanga kan nacion an isinairarom sa red heat alert.
Piglalaoman na maabot giraray sa 40 degrees Celsius an temperatura sa southern France, mantang nagpaluwas na nin red alert status an gobierno huli sa huma nin forest fires.
Susog sa datos, 7,000 na kasulo an nairehistro poon kan magpoon an tag-init, na tumupok nin mga 8,700 ektarya nin sa nacion.
Rinibong mga residente man an nag-ebakwar makalihis na maglakop an mga wildfires.
Mientrastanto, nai-record man sa Belgium an 1,222 excess deaths na naglangkaw nin 39 porsyento, haros kabanga kan mga nagadan na sobra sa 85 anyos.
Sa Netherlands, naireport man kan mga otoridad an pigkakarkulong 480 excess deaths, kadaklan digdi may edad 80 pataas, makalihis mag-abot an temperatura sa haros 40 degrees Celsius.
Susog sa Copernicus Climate Change Service, an Europa iyo an pinakamarikas na nag-iinit na kontinente sa gabos na kontinente asin doble an pag-init kaysa sa pankinabang average.
Huli kaini, nagigin mas pirmihan an naeeksperyensyahang matitinding heatwave, kakulangan sa suplay nin tubig, asin wildfire sa nabanggit nacion.
