LEGAZPI CITY- Napasakamot kan mga personahes kan Legazpi City Veterinary Office asin National Meat Inspection Service (NMIS) an labi sa 200 kilos na “hot meat” o mishandled meats hale sa nagkapirang merkado asin malls ciudad.
Sa intrevista kan Bombo Radyo Legazpi ki NMIS Regional Technical Operations Center 5 Officer in-charge Dr. Alex Templonuevo, matrayumpo an resulta kan haloy na ginibong surveillance hasta sa strike makalihis na makumpiskar an nasa 255 kilo kan manlaen-laen na klase kan karne puon sa poultry, pork, by-products magin an mga imported, frozen o chilled meats.
Napag-araman na kadaklan sa mga ini an nagbayolar sa tamang temperatura para sa chilled meat mantang nakatalaan naman na i-dispose an mga nakumpiskar na karne sa condemnation place sa slaughterhouse.
Liwat na tinawang-duon kan NMIS na dae nagkukulang an mga otoridad sa pagpapagirumdom sa mga paratienda sa tamang paghandle kan mga karne siring man an pag-preserve kan mga ini sa tamang temperatura.
Afuera man sa penalidad, mahahampang pa sa pagkakarsel an mga meat vendors na mapoprobarang “persistent violators” sa irarom kan Acta Republika Numerado 10536 o an inamyendaran na Meat Inspection Code of the Philippines.
