LEGAZPI CITY-Kinumpirma ni Philippine Ambassador to Thailand Millicent Cruz-Paredes na igwang 118 na mga Pilipino sa Thailand an pigebakwar sa tahaw kan nagpapadagos na tensyon sa border sa pagultangan kan Thailand asin Cambodia.
Kadaklan suboot sa mga pigebakwar an mga Pilipinong paratukdo sa Thailand na nasa mga probinsiya na matinding apektado kan nasabing labanan.
Sa presente, igwa nang labi sa 350 na dokumentadong Pilipino an nagtetenir sa pitong probinsiya sa Thailand border alagad nasa 118 an apektado asin kinakaipuhan nang i-ebakwar.
Wara man suboot na mga Pilipino an nasa peligro o nairehistrong nawawara, asin gabos man nasa marhay na kamugtakan.
Pigsierto man kan Philippine envoy an pagtatao kan embahada nin tabang pinansyal para sa mga apektadong Pilipino na nagtutukdo sa mga eskwelahan sa border provinces na nagkansela kan klase huli sa nasabing tensyon.
Padagos man an monitoring kan Embahada kan Pilipinas sa Thailand sa sitwasyon kan mga pinapaebakwar na mga Pilipino.
