LEGAZPI CITY- Pighahanda na kan mga otoridad an kasong isusunad kontra sa lider kan Conception Criminal Gang na nagsurendir sa banwaan kan Libon, Albay.
Marurumduman na si alyas Marasigan an pigtataram na huring lider kan nasabing grupo, na ipigkokonektar sa manlain lain na kriminalidad sa nagkapirang parte kan rehiyon.
Segun ki National Bureau of Investigation Bicol Assistant Regional Director Manuel Antonio Eduarte na kaibanan sa mga kasong isusunad sa suspek an anom na murder charges, tulong counts nin kidnapping and serious illegal detention asin tulong attempted murder.
Sa presente nagtetenir si alyas Marasigan sa temporary detention cell kan ahensya.
Mientras tanto, marurumduman na ipigsurendir man kan suspek an mga haralangkaw na kalibre kan badil na pinagtutubudan na pigagamit kan grupo.
Sa presente, sinabi ni Eduarte na maikokunsiderar na totally neutralized na an Conception Criminal Gang sa nakalihis na mga operasyon kan mga otoridad.
