Labi sa sarong milyon na mga Grade 11 students sa bilog na nacion an nadidifisilan na masabutan an saindang pigbabasado, segun sa report kan Second Congressional Commission on Education (EDCOM 2).
Napag-araman na nagluwas sa ipigsagibong Senior High School literacy assessment kan Department of Education (DepEd) kan Marso 2026 na 1.3 milyon sa 1.4 milyong Grade 11 students an may problema sa reading comprehension.
Solamenteng 12% sana kan mga estudyante na Grade 11 an maikokunsiderar na “independent learners” o kayang masabutan nin marhay an saindang pigbabasa.
Sa nasabing numero, haros anom sa kada sampulong estudyante an nasa “frustration level,” an pinakahibabang antas kan literacy kun sain haros dae ninda nasasabutan an pigbabasa.
Mientras tanto, haros tulo sa kada sampulong mga estudyante man an nasa “instructional level,” na nangangaipo pa nin gabay hali sa mga paratukdo ngani na masabutan an teksto kan saindang pigbabasa.
Pigbabasol man kan ACT Teachers Party-list an suboot sistematikong problema sa educational system, partikular an polisiya kan mass promotion sa mga estudyante.
Bako sana an Grade 11 students an apektado kan problema huli ta saegun sa EDCOM 2, nasa 40% kan mga estudyante sa gabos na grade levels an nadidifisilan man liwat sa reading comprehension.
Mientras tanto, sinabi ni Education Secretary Sonny Angara na tututukan kan Department of Education an teacher training ngani na mas mapakusog an pagsabot kan mga estudyante bako sana sa memorization.
