LEGAZPI CITY-Nakuwa kan Pilipinas an dakulang kapangganahan makalihis halion kan Estados Unidos an taripa sa labi $1 bilyon na kantidad kan mga produktong agrikultural kan nacion, kairiba an mga industrial goods—na nagtataong dalan sa haros kabanga kan kabilugang eksport kan Pilipinas sa Estados Unidos na makalaog bilang duty-free.
Segun kay Acting Finance Secretary Frederick D. Go, dakulang tabang ini sa mga paraooma uli sa kaiba sa mga produktong inanggalan nin 19% na taripa an batag, niyog, mangga, dried guava, kape, tsaa, mga spices asin nagkapirang fertilizers.
Sinabi ni Go, na na pagtanggal kan taripa an magpapauswag sa kompetitibong kakayahan kan mga produktong Pilipino, magkrear nin trabaho asin magpatatag sa pag-suplay.
Segun sa Department of Trade and Industry, nagabot sa $1 bilyon an export value kan mga produktong agrikultural kan 2024, matang $5.8 bilyon na man an kantidad kan industriyal na produkto na kaiba sa exemptions.
Ipiganunsyo man kan White House na tinanggal ninda an taripa makalihis an reciprocal trade talks asin pagbusisi sa domestic demand asin sa kapasidad kan produksyon.
Sa bagong polisiya, haros $14.5 bilyon na eksport kan Pilipinas sa U.S. an makakalaog nin warang taripa kaiba na an industrial products siring kan semiconductors.
Padagos man suboot an negosasyon kan ahensya ngani makabale digdi an garments, textiles, asin sa masunod na batch kan tariff exemptions.
An 19% na taripa an ipinataw kan U.S. sa kadaklan na mga produktong Pilipino kan Hulyo, kasabay kan iba pang major ASEAN economies.
