Sienerto kan Land Transportation Franchising and Regulatory Board (LTFRB) an mas marikas asin padagos na pagbabarewas nin fuel subsidy makalihis kumpirmaron na nag-abot na sa labi P651 milyon hale sa kabilogang P2.5 bilyong pondo an naibarewas sa mga public utility vehicle (PUV) drivers asin operators sa bilog na nacion.
Ini an nagin bagong anggulo kan ahensya makalihis ipigtuga na nagkaigwa nin bahagyang abala sa enot na yugto kan pagbabarewas na nagpuon pa kan ika-25 kan Marso.
Sa sarong pahayag, sinugo ni LTFRB Chairperson Atty. Vigor Mendoza II an gabos kan saindang regional directors na siertohon an marikas, maayos, asin warang patod na pagtao nin nasabing cash assistance.
Basado sa datos kan ahensya, hale sa kabilogang P651,185,000 na naibarewas, pinadakulang pondo an napasiring sa Metro Manila na nakaresibe nin P181.2 milyon.
Nagsunod digdi an CALABARZON na may P98.2 milyon, asin Central Luzon na nakakua man nin P73.4 milyon.
Kumpiyansa an pamayuhan kan LTFRB na mas mapaparikas na an pag-usad kan programa sa mga masunod na aldaw nganing matabangan an sektor kan transportasyon.
Sakop kan ayuda an mga nagmamaneho asin operators kan mga tradisyunal asin modern jeepneys, UV Express, passenger asin point-to-point buses, Transport Network Vehicle Service (TNVS) partners, Filcabs, taxi, tricycle, asin magin an delivery services.
