LEGAZPI CITY—Pigkarkulong labi sa P1-milyon na kantidad nin danyos an nai-record sa nangyaring kasulo sa Purok 4, Barangay Bagumbayan, sa banwaan kan Daraga Albay.
Magigiromdomang buminangkaras an sarong kasulo sa sarong residencia sa nasambitang lugar bandang hapon kan Miyerkules, Abril 9, 2025.
Segun ki BFP Daraga Investigator FO2 Kerr Anthony Macasinag, sa intrevista kan Bombo Radyo Legazpi, na pig-estimar na nasa P1,181,550 an kantidad kan danyos kan nasulong harong.
Dugang kaini na an nadanyaran na parte iyo an ikaduwang palapag kaini asin sarong kwarto sa primerong palapag kan residencia.
Wara man na nairidong indibidwal sa nasambitang insidente.
Sa presente nagpapadagos pa an imbestigasyon kan mga otoridad sa kun ano an naging kawsa kan naunambitag kasulo.
Mientrastanto, nagpagiromdom man an opisyal sa publiko na en kaso man may mangyaring kasulo an dae na muna mag-post o mag-live sa social media, kundi dapat enoton na mag-apod sa mga otoridad ngani na mapalsok tulos ini.
Nagpagiromdom man ini sa mga mabakasyon na dae pagbayaan an saindang mga appliances sa harong na nakasaksak, ipag-check an gasul, asin pagsiertohon na nakakandado an mga harong nganing maibitaran an ano man na dae piglalaomang insidente siring kan panghahabon.
