Naka-heightened alert na an bilog na hanay kan Philippine National Police (PNP) katakod kan napaparaning Simbang Gabi na mapuon sa Disyembre 16.
Sa irarom kan programang “Ligtas Paskuhan 2025”, labi 70,000 kapulisan an ipakakalat sa mga simbahan asin iba pang matawong lugar nganing siertohon an kaligtasan kan publiko.
Segun ki PNP Acting Chief Lt. Gen. Jose Melencio Nartatez, papahigoton an foot patrols, checkpoints, mobile patrols asin pakikipagkoordinar sa mga LGU, barangay official asin pamayuhan kan simbahan para sa crowd control asin tulos na responde sa emergency.
Ipigsugo man ni Nartatez sa gabos nin police commander na bantayang bako sana an mga simbahan kundi pati an mga kalapit na lugar na kalimitang pigdumanan kan mga nagsisimba makalihis an misa.
Magigin alerto man an pulisya laban sa harabonan, pickpocketing, trapik, kasulo asin iba pang emerhensya.
Inabisuhan man an publiko na mag-ingat, bantayan an mga gamit, magsunod sa traffic rules asin tulos na i-report an anumang kaduda-dudang aktibidad.
Magkakaigwa man nin police assistance desks sa mga simbahan, terminal, mall asin tourist spots, orog na sa Disyembre 24 asin 31.
