Maabot na sa 2,816 katawo an nag-ebakwar huli sa destrosong dara kan bagyong Ada.
Ini an katampad kan 997 na pamilya na presenteng yaon sa 22 evacuation centers.
Sa kabilogan, 63,882 katawo an napag-araman na apektado, katampad kan 23,022 na pamilya.
An mga ini hale sa 90 barangay sa Bicol Region, Eastern Visayas, asin Caraga Region.
Segun sa Department of Social Welfare and Development (DSWD) – Disaster Response Management Office, padagos pa man giraray an pag-ebakwar kan mga lokal na gobyerno sa nagkapirang mga residentes na presenteng apektado kan sunod-sunod na pagbaha huli kan warang patod na pag-uran, kun kaya piglalaoman na mabago pa an datus.
Nagpadara man an gobyerno nin ginatos na family food packs sa mga evacuation centers kun sain yaon an mga biktima kan bagong bagyo.
Sa presente, an Pilipinas igwa nin haros P3.4 bilyon na kantidad nin relief resources para sa mga biktima nin kalamidad na kompuesto nin labi P75 milyon na quick response funds asin P3.3 bilyon na kantidad nin mga food asin non-food items.
