LEGAZPI CITY—Suminakat na sa labi 300 indibidwal asin establishimiento an nagbayolar sa City Ordinance No. 16-003-2023 o Comprehensive Anti-Smoking/Vaping Ordinance sa ciudad ni Legazpi.
Segun ki Legazpi City Smoke Free Unit Team Leader Jose Balbin, sa intrevista kan Bombo Radyo Legazpi, maabot sa 270 indibidwal asin 44 na establishimiento an nagbayolar sa nasabing ordinansa puon kan bulan nin Marso sagkod Hunyo ngunyan na taon.
Segun saiya na naghahagad na sinda nin dugang na enforcers asin logistics nganing mas dakol an masakop na mga lugar sa nasambitang ciudad.
Siring man an kahagadan nin security o body cam nganing magserbi bilang proteksyon kan violator asin enforcers nganing maibitaran an ano man na dae pagkakasinabutan.
Dugang ni Balbin na an multa para sa mga inidbidwal na nagbayolar sa ordinansa sa 1st offense an igwang P1,000; 2nd offense na may P1,500; asin 3rd offense na may P2,000.
Mantang sa mga nagbayolar na establishimiento an 1st offense igwang P2,000; 2nd offense na may P3,000; asin 3rd offense na may P5,000 na multa.
Mientrastanto, padagos man an pangapudan kan opisyal sa publiko partikularmente na an mawot na magbisita sa ciudad na istriktong pigbabawal an paninigarilyo asin vaping sa lugar.
