LEGAZPI CITY — Preparado suboot an Task Force Sagip para sa Mayon sa pagpapadara kan reinforcement sa mga local government units (LGUs) na mahagad kan augmentation support urog na sa pagpapauli kan nagkapirang evacuees makalihis an deklarasyon sa Alert Level 3 status kan bulkan.
Sa intrevista kan Bombo Radyo Legazpi ki Task Force Mayon spokesperson Col. Patrick Cinco, nakadepende sana man an pwersa sa direktibang ibababa kan Office of the Civil Defense (OCD) Bicol.
Nasa labi sa sampulong trucks suboot an nakaantabay sa pagtabang na hale sa lado kan Philippine National Police (PNP) asin Armed Forces of the Philippines (AFP) na prayoridad na i-cater an mga ipig-evacuar hale sa ciudad kan Legazpi, Daraga, Malilipot asin Sto. Domingo alagad bukas man sa iba pang banwaan.
Afuera man sa posibleng i-augment na suporta, prepositioned na man suboot an saindang mga lunadan sa iba pang apektadong lugar alagad pighihiling na bastante pa man sa ngonian an mga behikulo kan kada LGU.
Sa ibong na lado, segun ki Cinco, mantenido an pigkrear na task force sa pagmonitor sa kamugtakan kan bulkan asin pagtataong-asistensya sa mga apektado hasta dae nagbabalik sa normal na kondisyon an bulkan.
