Nagdagdag nin pondo an Kamara de Representantes para sa sektor nin agrikultura sa ₱292.9 bilyon sa House version kan 2026 General Appropriations Bill (GAB) na may katuyuhan na mapakusog an suporta para sa mga paraoma asin mga parasira, mapauswag an imprastrakturang rural, asin mapalawig an farm mechanization.
Segun ki House Appropriations Chairperson Rep. Mikaela Angela Suansing, an Kamara nagdagdag nin ₱53.8 bilyon sa agriculture cluster bilang parte kan pagtutok kaini sa seguridad sa pagkakan asin rural development.
Kabale sa dagdag-pondo an ₱10 bilyon para sa Presidential Assistance for Farmers and Fisherfolk, na piglalaoman na makakatabang sa mga 1.43 milyon na paraoma asin parasira, asin ₱35.5 bilyon para sa mga farm-to-market roads asin irrigation, na nagdadara kan total na pondo kaini sa ₱74.5 bilyon.
Nag-alokar man an Kamara nin ₱30 bilyon sa irarom kan Rice Competitiveness Enhancement Fund para sa farm mechanization, ₱1 bilyon para sa crop insurance, ₱2.4 bilyon para sa deep-water ports, asin ₱200 milyon para sa implementasyon kan New Agrarian Emancipation Act.
Sinabi kan Kamara na an mga pondong ini an may katuyuhan na mabawasan an gastos sa produksyon, madagdagan an ani asin ganansya kan mga paraoma, asin mapakusog an sektor nin agrikultura mantang nagpapadagos an bicameral deliberations sa 2026 budget.
 with the aim of strengthening support for farmers and fishermen, developing rural infrastructure, and expanding farm mechanization.){kind=link}